Deimhnithe ag an mBanc Ceannais go bhfuil suíomh d’ionad nua airgid thirim ceannaithe

D’fhógair Banc Ceannais na hÉireann inniu (an 14 Feabhra 2025) go bhfuil suíomh faighte ar a ndéanfar ionad nua airgid thirim a fhorbairt.

Tá aontaithe ag an mBanc Ceannais 29.5 acra talún a cheannach i mBaile Seiscinn, Fionnghlas, ar chostas €14m agus go bhfuil rún ionad airgid thirim a fhorbairt ansin ach cead pleanála a fháil chuige sin. Le ceannach an tsuímh seo, tugtar próiseas roghnúcháin docht chun críche.

Leag an Banc Ceannais amach i mí na Nollag 2022 a chinneadh ionad nua airgid thirim a fhorbairt ar shuíomh eile i mórcheantar Bhaile Átha Cliath agus an suíomh in Áth an Ghainimh a dhíol. I rith na 1970idí a tógadh na foirgnimh atá in úsáid in Áth an Ghainimh agus ní bheidh siad fóirsteanach don chúram i bhfad eile.

Deir Marcella Flood, an Príomh-Oifigeach Oibriúcháin i mBanc Ceannais na hÉireann: “Céim shuntasach atá á fógairt inniu maidir le gné bhuntábhachtach bonneagair a chur ar fáil chun leasa na tíre. Léirítear leis go bhfuil an Banc Ceannais agus an tEurochóras tugtha d’airgead tirim a bheith ar fáil mar mhodh íocaíochta. Is beart mór infheistíochta an t-ionad nua airgid thirim ag an mBanc Ceannais agus déanfar é a mhaoiniú as acmhainní an Bhainc féin.

“Rachaidh an Banc Ceannais ar aghaidh anois leis an gcéad chéim eile den tionscadal seo trí dhearadh mionsonraithe a ullmhú agus trí iarratas a dhéanamh ar chead pleanála. Meastar i gcónaí nach mbeidh ionad nua airgid thirim ar fáil go ceann seacht mbliana ar a laghad. Go dtarlaíonn sin, leanfar leis an obair in Áth an Ghainimh agus cothófar caidreamh lánchuimsitheach le muintir an bhainc agus le páirtithe leasmhara eile de réir mar a thugtar an tionscadal tábhachtach seo chun cinn.”