Seanairgead nó Airgead Damáistithe a Mhalartú
Fógra | Is féidir leat coinne a dhéanamh chun airgead a mhalartú sa Bhanc Ceannais
Is gá duit coinne a dhéanamh chun nótaí bainc nó boinn a mhalartú i bpearsa in oifig phoiblí an Bhainc Ceannais. Tá sé seo i gcomhréir le treoirlínte sláinte poiblí a bhaineann le COVID-19.
Tá eolas thíos maidir leis an gcaoi chun coinne a dhéanamh.
Is féidir leat iarratas a dhéanamh chuig Banc Ceannais na hÉireann chun seanairgead nó airgead damáistithe a mhalartú. Leis an tseirbhís seo, is féidir leat an méid seo a leanas a mhalartú:
- IR£ punt: Sean-nótaí bainc agus sean-bhoinn Éireannacha nó nótaí bainc damáistithe agus boinn dhamáistithe Éireannacha
- € euro: Nótaí bainc damáistithe euro agus boinn dhamáistithe euro
Ní féidir leat an méid seo a leanas a mhalartú:
Má ghlactar le d’iarratas, déanfaimid aisíocaíocht leat trí airgead a aistriú chuig do rogha cuntas bainc. Ní féidir linn airgead tirim a íoc leat.
Conas iarratas a dhéanamh
Lean na céimeanna anseo thíos chun d’iarratas a ullmhú.
Céim 1. Ullmhaigh do chuid nótaí agus bonn
IR£ punt: Seanairgead nó airgead damáistithe
Is féidir leat iarratas a dhéanamh chun sean-phuint agus sean-bhoinn IR£ a mhalartú ar euro.
IR£1 = €1.269738 is ea an ráta malairte.
Is féidir leat sean-phuint dhamáistithe IR£ a mhalartú freisin. Mar shampla, nótaí bainc atá leathdhóite, gearrtha nó lofa.
Féach thíos maidir leis an gcaoi chun airgead a ullmhú agus a phacáistiú, roinnt coinníollacha speisialta san áireamh.
€ euro: Nótaí bainc damáistithe agus boinn dhamáistithe
Is féidir leat iarratas a dhéanamh chun nótaí bainc damáistithe agus boinn dhamáistithe euro a mhalartú. Déanfaidh an Banc Ceannais measúnú ar d’iarratas i gcomhréir lena chuid nósanna imeachta atá faoi rialú ag Cinneadh an 19 Aibreán 2013 ón mBanc Ceannais Eorpach maidir le hainmníochtaí, sonraíochtaí, atáirgeadh, malartú agus aistarraingt nótaí bainc euro (BCE/2013/10)
Féach thíos maidir leis an gcaoi chun airgead a ullmhú agus a phacáistiú, roinnt coinníollacha speisialta san áireamh.
Céim 2. Íoslódáil agus líon isteach an fhoirm iarratais/na foirmeacha iarratais
Tá foirmeacha ar leith ann le haghaidh nótaí bainc agus boinn euro agus le haghaidh nótaí bainc agus boinn Éireannacha.
€ euro
Malartaigh nótaí bainc damáistithe € euro | pdf 273 KB
Malartaigh monaí damáistithe € euro | pdf 936 KB
IR£ punt
Malartaigh nótaí bainc IR£ | pdf 158 KB
Malartaigh monaí IR£ | pdf 803 KB
Céim 3. Ullmhaigh doiciméid tacaíochta
Iarratas pearsanta os cionn €200
Más mó ná €200 luach an mhalartaithe, ní mór duit fótachóip ardchaighdeáin a chur ar fáil de dhoiciméad oifigiúil aitheantais ar a dtaispeánfar an t-ainm atá luaite sna sonraí cuntais bainc a thug tú ar d’fhoirm iarratais. Mar shampla:
- Do phas
- Do cheadúnas tiomána
Is gá go mbeidh d’ainm iomlán agus grianghraf le feiceáil go soiléir ar an bhfótachóip. Is gá duit freisin cruthúnas a thabhairt ar do sheoladh agus ar úinéireacht an chuntais bainc a ndéanfar an t-airgead malartaithe a íoc isteach ann (e.g. ráiteas folaithe bainc).
I gcás ina mbeidh méid níos mó ná €1,000 i gceist, ní mór duit sonraí iontaofa neamhspleácha a chur ar fáil, mar aon le doiciméid agus/nó faisnéis chun foinse na gcistí a chruthú agus/nó cruthúnas ar úinéireacht na nótaí bainc. Mar shampla:
- doiciméid lena bhfianaítear go ndearnadh íocaíochtaí leat
- ráitis cuntais bainc/admhálacha ar aistarraingtí cuntas
- admhálacha ar dhíolachán
- doiciméid dhlíthiúla, etc.
Iarratas gnó os cionn €200
Déan cinnte go bhfuil an t-eolas seo a leanas ag gabháil le d’iarratas:
- Uimhir CRO (an Oifig um Chlárú Cuideachtaí)
- Fótachóip ardchaighdeáin de ráiteas folaithe bainc le haghaidh chuntas bainc na cuideachta a shonraítear ar d’fhoirm iarratais.
Céim 4. Seiceáil na coinníollacha iarratais eile
B’fhéidir go mbeidh ort coinníollacha eile a chomhlíonadh chun iarratas a dhéanamh ar mhalartú. Mar shampla, sna cásanna seo a leanas:
Léigh na coinníollacha go léir thíos.
Céim 5. Cuir isteach d’iarratas
Tá trí rogha agat chun d’iarratas a chur chuig an mBanc Ceannais:
Rogha 1: I mbrainse de bhanc miondíola
I gcásanna áirithe, beidh tú ábalta seanairgead Éireannach nó airgead damáistithe a mhalartú i do bhrainse bainc. Beidh ort foirm mhalartaithe iomchuí an Bhainc Ceannais a líonadh i mbrainse de bhanc miondíola, ansin beidh siadsan in ann an t-iarratas a chur ar aghaidh chuig an mBanc Ceannais ar do shon. Déan teagmháil dhíreach le do bhanc chun an rogha seo a fhiosrú.
Rogha 2: Post Cláraithe
Is féidir le hiarratasóirí in Éirinn an fhoirm iomchuí a líonadh isteach agus a sheoladh go díreach leis an bPost Cláraithe chuig an seoladh atá liostaithe ar an bhfoirm.
Féach suíomh gréasáin An Post chun tuilleadh eolais a fháil maidir le nithe srianta a sheoladh leis an bpost. Ar do phriacal féin atá sé iarratas a sheoladh leis an bpost chuig an mBanc Ceannais.
Rogha 3: In Oifig Phoiblí an Bhainc Ceannais [ach choinne a dhéanamh]
I gcomhréir le treoirlínte sláinte poiblí agus rialtais, tá srianta i bhfeidhm faoi láthair maidir le cuairteoirí chuig ár n-oifig phoiblí de thoradh COVID-19 agus is gá coinne a dhéanamh.
Conas coinne a dhéanamh le Banc Ceannais na hÉireann chun Punt Éireannach (IEP) agus nótaí bainc damáistithe euro a mhalartú.
Coinníollacha speisialta a bhaineann le Covid-19: Beidh an tseirbhís thuasluaite ar fáil suas go dtí Leibhéal 4 de Phlean an Rialtais maidir le Maireachtáil le Covid-19 (agus Leibhéal 4 san áireamh). Beidh foirgneamh an Bhainc Ceannais dúnta do chuairteoirí má bhíonn srianta Leibhéal 5 den phlean sin i bhfeidhm.
Is féidir coinne a dhéanamh ag na hamanna seo a leanas: 13.00, 13.30 agus 14.00 ó Luan go hAoine.
Cuir ríomhphost chuig [email protected] nó cuir glaoch ar +353 (1) 2245969 chun coinne a dhéanamh.
Nuair a bheidh do choinne deimhnithe, iarrfar ort foirm féindearbhúcháin maidir le Coivd-19 a líonadh roimh do chuairt. Cuirfear an fhoirm seo chugat leis an ríomhphost mar aon le treoracha chun teacht ar an bhfoirm iarratais ar líne (Céim 2).
Ní mór cóip pháipéir den fhoirm Féindearbhúcháin a thabhairt leat ar lá do choinne agus coinneofar an fhoirm sin mar chuid den iarratas.
Do choinne sa Bhanc Ceannais
Nuair a thiocfaidh tú isteach sa Bhanc Ceannais, iarrfaidh an lucht Slándála ort do theocht a thógáil ar mhaithe le bearta sláinte agus sábháilteachta. Má tá do theocht ard, ní mór duit an foirgneamh a fhágáil agus filleadh i gceann 10 nóiméad chun í a thógáil arís. Má tá do theocht ard an dara huair, ní féidir leat freastal ar do choinne. Ar mhaithe le sláinte agus sábháilteacht na foirne agus daoine eile den phobal, beidh ort an foirgneamh a fhágáil agus coinne nua a dhéanamh amach anseo. Cuirfidh an lucht Slándála nó an fhoireann fáiltithe in iúl do na hairgeadóirí go raibh ort imeacht.
Má tá gnáth-theocht agat, is féidir leat dul chuig Oifig na nAirgeadóirí san ionad fáiltithe ag am do choinne.
Ní mór do chuairteoirí chuig an bhfoirgneamh cumhdaigh aghaidhe a chaitheamh gach tráth.
Coinní Siúil Isteach
Beidh dhá choinne siúil isteach ar fáil ag 15.00 agus 15.15 do dhaoine den phobal ar bhonn ‘tús freastail ar an gceann is túisce’. (Tabhair faoi deara, le do thoil: mura na coinní níos luaithe san iarnóin curtha in áireamh, beidh siad sin ar fáil freisin do dhaoine den phobal ar bhonn ‘tús freastail ar an gceann is túisce.’)
Chun a chinntiú go bhfreastalófar ort, molaimid duit coinne a dhéanamh roimh ré mar atá leagtha amach thuas. Má bhíonn tú ag brath ar an tseirbhís siúil isteach, níl aon chinnteacht ann go mbeidh teacht agat ar an tseirbhís má bhíonn éileamh mór uirthi. B’fhéidir go n-iarrfar ort teacht ar ais lá éigin eile mura bhfuil coinne siúil isteach ar fáil.
Mura bhfuil coinne agat, tabharfaidh duine den lucht slándála cóip pháipéir duit den fhoirm Féindearbhúcháin maidir le Covid-19. Ní mór duit an fhoirm sin a líonadh agus coinneofar mar chuid de d’iarratas í.
Má tá coinne déanta agat chun teacht isteach chuig an bhfoirgneamh, nó má tá tú ag smaoineamh ar an tseirbhís siúil isteach, ní mór duit foirmeacha éagsúla a líonadh agus a thabhairt d’Oifig na nAirgeadóirí.
Céim 6. Tar éis duit iarratas a dhéanamh
Nuair a bheidh d’iarratas faighte againn, seiceálfaimid go bhfuil na nithe seo a leanas ann:
- Foirm/foirmeacha iarratais, a bheidh líonta isteach
- An t-airgead atá le malartú i.e. nótaí agus/nó boinn
- Doiciméid tacaíochta (más gá)
Seiceálfaimid coinníollacha eile más gá, e.g. meáchan, éilliú, etc.
Próiseálfaimid d’iarratas ansin. Chuige sin, b’fhéidir go mbeidh orainn tástáil a dhéanamh ar na nótaí nó ar na boinn agus teagmháil a dhéanamh le hOifig na gCoimisinéirí Ioncaim, leis an nGarda Síochána, agus le húdaráis inniúla eile.
Malartú iomlán
Déanfar iarratais a mheas agus a chinneadh i gcomhréir le nósanna imeachta an Bhainc Ceannais atá faoi rialú ag Cinneadh an 19 Aibreán 2013 ón mBanc Ceannais Eorpach maidir le hainmníochtaí, sonraíochtaí, atáirgeadh, malartú agus aistarraingt nótaí bainc euro (BCE/2013/10). Déanfaidh an Banc Ceannais a dhícheall iarratais a chinneadh laistigh de thréimhse réasúnach. Beidh taiscthí ardluacha faoi réir grinnscrúdú breise agus má mheastar gur gá dul i dteagmháil le hOifig na gCoimisinéirí Ioncaim, leis an nGarda Síochána agus/nó le húdaráis inniúla eile, beidh tréimhse ama níos faide i gceist chun cinneadh a dhéanamh ina leith.
Má dhiúltaítear do d’iarratas
Mura gcomhlíonann d’iarratas na coinníollacha go léir, diúltófar do d’iarratas agus cuirfimid ár gcinneadh agus na fáthanna atá leis in iúl duit i scríbhinn. Mar shampla, má chuireann tú níos lú ná leath de nóta bainc euro ar fáil lena mhalartú agus mura gcuireann tú cruthúnas ar fáil gur scriosadh na codanna den nóta atá ar iarraidh.
Mura bhfuil tú sásta le toradh d’iarratais, nó leis an gcaoi inar chaith an eagraíocht leat, is féidir leat gearán a dhéanamh linn.
Féach anseo thíos na coinníollacha a bhaineann le diúltú.
Rialacháin agus Coinníollacha
€ euro agus IR£ punt
€ euro:
Déan cinnte go gcuireann tú do chuid nótaí bainc agus bonn ar fáil ar chaoi inar féidir linn iad a shainaithint agus a fhíorú.
Tá seans ann go dteipfidh ar d’iarratas nó go mbeidh moill air má bhíonn deacrachtaí againn na nótaí a shainaithint nó a fhíorú.
Mar shampla, déan aon nótaí bainc damáistithe a athchruthú a mhéid is féidir sula gcuireann tú chugainn iad.
Má tá do chuid nótaí bainc nó bonn éillithe nó más priacal iad don tsláinte agus don tsábháilteacht, ní mór duit measúnú sláinte agus sábháilteachta ó údarás arna chreidiúnú ag Bord Náisúnta na hÉireann um Chreidiúnú a chur ag gabháil le d’iarratas.
Mar shampla:
- Fuil
- Múscán
- Camras
- Drugaí
- Substaintí anaithnide
Diúltóimid aisíocaíocht a dhéanamh más eol dúinn, nó má tá cúis leordhóthanach againn lena chreidiúint:
- Go ndearnadh damáiste do nótaí bainc dílse nó do bhoinn d’aon ghnó (Nóta: glacfar le nótaí bainc a bhfuil abairtí gearra, uimhreacha nó notaí scríofa orthu)
- Go ndearnadh cion coiriúil
- Go bhfuil amhras ann gur nóta bainc góchumtha nó athraithe é
Coinneoimid siar nótaí bainc den sórt sin thuas mar fhianaise chun go bhféadfar imscrúdú coiriúil a thionscnamh nó chun tacú le himscrúdú coiriúil ag na húdaráis ábhartha.
Ag deireadh imscrúdú den sórt sin, féadfar aisíocaíocht a dhéanamh i leith na nótaí bainc sin mar is gnách, mura gcinnfidh na húdaráis ábhartha a mhalairt.
Is féidir linn aisíocaíocht a dhiúltú i gcás boinn euro a athraíodh d’aon ghnó nó trí phróiseas a bhféadfaí a bheith ag súil leis le réasún go ndéanfaí iad a athrú leis an bpróiseas sin.
Cuirfear in iúl duit i scríbhinn mura bhfuil aisíocaíocht ar luach iomlán d’iarratais á déanamh leat. Ansin seolfar chugat leis an bpost cláraithe aon nótaí bainc is féidir a thabhairt ar ais duit. Ní thabharfaimid nótaí ar ais duit má fhaighimid amach gur nótaí góchumtha iad.
Ní féidir leat nótaí nó boinn ar mó ná 10KG san iomlán a meáchan a mhalartú inár n-oifig phoiblí. Chun nótaí nó boinn ar mó ná 10KG a meáchan a mhalartú, ní mór duit cuideachta iompair airgid, a bheidh faofa ag an Údarás Slándála Príobháidí, a úsáid chun d’iarratas a chur chugainn.
Cuir glao ar 01 224 5969 le haghaidh tuilleadh eolais.
€ euro:
Féadfar táille láimhseála arb ionann í agus 5% de luach na mbonn a cuireadh chugainn a choinneáil siar ón aisíocaíocht ag brath ar leibhéal na tástála a bhí ag teastáil chun na boinn a fhíorú.
I gcás ina mbeidh aimhrialtachtaí i sampla bonn a thógfar as bosca nó mála mar chuid den phróiseas fíorúcháin, ní mór an mála nó bosca iomlán a sheiceáil. Féach Airteagal 11(2) de Rialachán (AE) Uimh 1210/2010 ó Pharlaimint na hEorpa agus ón gComhairle.
Sa chás seo, b’fhéidir go ndéanfaimid an táille láimhseála a fhorlíonadh le táille bhreise arb ionann í agus 15 faoin gcéad de luach ainmniúil na mbonn euro a cuireadh chugainn.
I gcás ina mbeidh boinn cóireáilte le substaintí ceimiceacha nó le substaintí guaiseacha eile sa mhéid go measann an Banc Ceannais ina leith go bhféadfaidh riosca sláinte bheith ag baint leo do lucht a láimhseála, déanfar na táillí a thoibhítear a fhorlíonadh le táille bhreise a bheidh comhionann le 20% de luach ainmniúil na mbonn euro a thugtar suas.
Féadfaidh an Banc Ceannais, diúltú luach ar bhoinn den sórt sin a thabhairt d’ainneoin go bhfuil na boinn tarraingthe siar ó chúrsaíocht aige.
Ní mór duit méideanna móra bonn Éireannach agus euro a shórtáil i málaí nó i mboscaí caighdeánacha ina mbeidh:
- 500 bonn i gcás gach ceann de na hainmníochtaí 2 euro agus 1 euro
- 1,000 bonn i gcás gach ceann de na hainmníochtaí 50 cent agus 20 cent
- 2,000 bonn i gcás gach ceann de na hainmníochtaí 10 cent, 5 cent, 2 cent agus 1 cent.
I gcás méideanna níos lú, is féidir leat na boinn a shórtáil i bpacáistí ar leith bunaithe ar an aghaidhluach.
Is gá go mbeidh liosta ar gach mála nó bosca ina gcuirfear síos ar a bhfuil sa mhála nó sa bhosca sin, na sonraí seo a leanas san áireamh:
- Na luachanna agus na hainmníochtaí atá ann
- Sonraí teagmhála an duine a chuir na boinn isteach
- Meáchan
- An dáta a ndearnadh iad a phacáistiú, agus uimhir an mhála nó an bhosca
Conas a úsáidfimid do chuid faisnéise
Nuair a bheidh foirm mhalartaithe nótaí bainc nó bonn á líonadh agat, iarrfaidh Banc Ceannais na hÉireann ort sonraí pearsanta a chur ar fáil chun gur féidir d’iarratas a mheas. Mura gcuireann tú an fhaisnéis phearsanta seo ar fáil, tá seans ann nach mbeimid ábalta d’iarratas a mheas agus aisíocaíocht a dhéanamh leat. Lorgaítear sonraí chun a chinntiú go gcomhlíonfaimid na dlíthe agus na rialacháin a bhaineann le Malartú Nótaí Bainc. Ar na sonraí atá ag teastáil chun an t-iarratas a mheas, áirítear ainm iomlán, seoladh, dáta breithe, sonraí teagmhála agus sonraí cuntais bainc. I gcás éileamh atá os cionn €200, iarrfar ort cruthúnas céannachta a thabhairt, cruthúnas ar sheoladh an iarratasóra ainmnithe nó cruthúnas údaráis má tá an t-iarratas á dhéanamh agat thar ceann duine éigin eile, chomh maith le cruthúnas ar chuntas bainc an iarratasóra ainmnithe. I gcás éileamh atá os cionn €1,000, is gá duit fianaise a thabhairt maidir le foinse na gcistí nó cruthúnas ar úinéireacht na nótaí bainc. Is gá seiceálacha breise a dhéanamh i gcás luachanna níos airde chun an t-éileamh a mheas i gcomhréir leis na hoibleagáidí a bhaineann le Malartú Nótaí Bainc agus le comhlíonadh cúraim ar mhaithe le leas an phobail.
Bainimid úsáid as an bhfaisnéis seo chun do chéannacht a dheimhniú, chun a chinntiú go bhfuil an ceart agat iarratas a dhéanamh ar an malartú seo agus chun measúnuithe a éascú chun go gcomhlíonfaimid na hoibleagáidí atá orainn mar Bhanc Ceannais i ndáil le Malartú Nótaí Bainc. Déanfar do chuid sonraí pearsanta a phróiseáil i gcomhréir le ceanglais na reachtaíochta um chosaint sonraí agus go sonrach chun go bhféadfar aisíocaíocht a dhéanamh leat. Ó am go chéile, i gcomhréir lenár gcuid oibleagáidí, b’fheidir go roinnfimid faisnéis le húdaráis ábhartha, mar shampla, An Garda Síochána agus Oifig na gCoimisinéirí Ioncaim. Ar na hábhair a mbreathnófar orthu, áirítear sciúradh airgid agus maoiniú sceimhlitheoireachta, ioncam agus coiriúlacht. Ó am go ham, féadfaidh Banc Ceannais na hÉireann taiscthí os cionn tairsí ar leith arna socrú ag Banc Ceannais na hÉireann a tharchur chuig údaráis inniúla ábhartha. Déanfar do chuid sonraí a stóráil ar feadh cibé tréimhse a mheasfaidh an Banc is cuí chun coireacht a chosc agus chun a chumasú dó dlíthe ábhartha a chomhlíonadh.
Do chearta
Tá cearta áirithe agat faoi na dlíthe um chosaint sonraí. Próiseálfar sonraí pearsanta i gcomhréir leis an reachtaíocht um chosaint sonraí. Is féidir leat aon cheisteanna maidir le próiseáil sonraí pearsanta ag Banc Ceannais na hÉireann a sheoladh chuig [email protected]. Is féidir leat tuilleadh eolais a fháil maidir leis an gcaoi ina ndéileálann Banc Ceannais na hÉireann le do chuid sonraí pearsanta ar ár leathanach gréasáin maidir le príobháideachas.
Teagmháil agus cúnamh
Má tá aon cheisteanna agat maidir leis an tseirbhís seo, déan teagmháil linn, le do thoil.